Helwest û axaftinên Mirad Qaraylan bala mirov dikşînin, dema ew ciwamêr diaxive yan jî dema helwest û bîr û boçûnên wî dixwînim, hest dibim ku ew cuwamêr cuda û ne bi refê xwe re difire, mirov hest dibe ku ew cuwamêr ji bo kurdayetiya giştî û ji bo pêşeroja me hemiyan tekoşînê dike.

Min tim devikî digot û ana nivîskî belav dikim ku ew cuwamêr di partiya xwe de xwediyê biryarên mezin û ne mezin ba, ezê yekemîn endam bûma di partiya wî de. Jixwe cuwamêrên wek wî ji zindiyan û şehîd bi giştî me ber bi hezkirina pkk ve dikşînin, lê mixabin gelekên din wê hezkirinê dikujin û dikin jahr û ziqûm. Do bû nizanim ne pêr, belkî berî şeş rojan bû min li du hevpeyvînên ku televizyona Al Jazeere û BBC bi birêz Mirad Qaraylan re kiribûn, temaşe kir, kurdiya wî ya xweş û şêrîn bala her kesî kişand, xwezî hemû serok û rêberên me wisa biaxivyana û siyaset bi kurdî bikirna, di dûv re dîtin û helwestên wî hîn bêtir balkêş û kurdewarî bûn.

Diyare Tirk naxwazin şer raweste, berjewendiya wan di berdewamiya şer de ye, jixwe Tirk bê şer najîn, gelek caran kurdan ji hêla xwe ve şer rawestandiye, lê bê encam bû ji ber aliyê din şerxwaze û ji bo ku pirsa kurd çareser nebe şer narawestîne. Mirad Qaraylan di hevpeyvîna xwe de anî ziman ku ew di bin çavdêriya Netewên Yekbûyî de amade ne çekan deynin. Bi dîtina min ew helwesta herî baş, bi hêz û rast e, daku netewên yekbûyî bikşînin nav vê pirsgirêka herî mezin di rojhilata navîn de. Ji netewên yekbûyî tê xwestin ku xwedî li vê pirsgirêka mezin derkeve, jixwe taku NY tev li vê pirsgirêkê nebe çareser nabe, lê bi gumana min dê Tirk derfetê nedin vê pêşniyara baş û ne jî bidin NY, lê NY divê zextê li Tirkiyê bike û bikeve navbera her du aliyan û li çareseriyan bigere.

Kosovo berî du salan serxwebûna xwe ragihandibû, do dadgeha navnetewî ew biryar erê û rewa nirxand, ên ku li duj derketin gotin ku dê sibe gelek tevgerên rizgarîxwaz(mîna kurdan) serxwebûna xwe ragihînin. Tirk wek desthilat û wek milet jî ne amade ne kurdan bipejirînin. Bi gumana min ku kurd wek Kosovo bikin jî dê bi ser nekevin, çimkî berjewendiyên welatên mezin hîna jî ne di serxwebûna Kurdistanê dene. Lê Kosovo dibe nimûneyek baş ji bo serxwebûna Kurdistanê(Başûr). Hema hema tevaya welatên cîhanê bi serxwebûna Kosovo re bûn, lê guman nakim bi jimara tiliyên destan bi serxwebûna kurdan re bin. Kurd dikarin nimûneya Kosovo daxînin rojevê û xwe wek nimûne ragihînin, dikarin bikin mijarên rojane ji medya û ragihandina xwe re.

Wek Tirk dixwazin qet nabe, dixwazin kurd bê deng bin, bê hêz bin, tune bin, pûç û bawî bin, di dûv re wek dixwazin vebûna kurd pêkbînin, jixwe vebûn ne ji bo kurdaye, belê ji bo razîkirina Europa û Emerîka ye.

Bi min vebûna kurd a ku Erdogan pê bang dike hemû derew û xapandine. Erdogan ne tenê bi rûyê kurdan dikene, belê bi rûyê tevaya dunyayê dikene. Ji dû vebûnê Erdogan dixwaze ji dunyayê re diyar bike û bêje; binerin em dixwazin pirsa kurd çareser bikin, lê kurd derfetê nadin û şer berdewam dikin. Bi min sibe, yan dusibe, belkî jî demek din pirsa kurd dê tenê bi destên derve çareser bibe. Tirk, ereb û firs ne dikarin, ne jî dixwazin çareser bikin, ji ber naxwazin milet û welatên wan bê ser êşandin bijîn, ew bêtarên îro dispêrin sibe, ew jî dizanin ku ne îro be dê sibe be, yan sed salên din be, ku pirsa kurd dê çareser bibe, lê ta wê demê dê çi bibe û çi nebe.

Eger Erdogan raste di vebûnê de, naxwe ew çi dest û poz şikandin in, ew çi zindan û girtîgehên zarokên keviran in, ew çi dîmena kirêt bû ya ku bi dehan şaredarên kurd kişandin girtîgehên qaşo vebûna kurd, ew çi êrîşên rojane ne li ser kurdan, bi dehan Erdogan soz dane herêma kurda, lê yek jî pêk neaniye, li rojnamevan Vedat Kurşun 166 sal ceza hat birîn, girtina DTP, lêdan û pozşikestina Ehmed Turk, êrîşên artêşa tirk li ser başûrê Kurdistanê, û gelek gelek nimûneyên din ku vebûnê piştî salekê beravêtî dikin hene, wek bûyerên li Hatay, piştî ku pkk çar polîsên tirk kuştin, tirkan jî êrîş birin ser mal û mewdanên kurdan. Ev ne nîşanên vebûnê ne, ne jî nîşanên xêrê ne. Bi min vebûn tenê axaftine, çimkî ne Erdogan ne jî miletê tirk ne amade ne kurdan bipejirînin û pirsa kurd çareser bikin. Vebûnê bi Tv yek ziman şikestî destpêkir û piştî salekê hîç kurdan negotin xwezî bi îro, êdî çi vebûn û çi ziqûm e.

Eger îro pirsa kurd çareser nebe dê sibe yan dusibe çareser bibe, yên ku pirsgirêk û bêtarên îro dispêrin sibe, dixwazin tim şer berdewam be û bêtaran çareser nekin.

Erdoganê sedrûyî Hemas welatperwer û berxwedanker dibîne, lê kurdan terorîst dibîne. Erdogan bi Ereban jî dikene, wan jî dixapîne, tenê berjewendiyên xwe bi ereban re dimeşîne û di eynî demê de dev ji Israîlê jî bernade, bi min hemû lîska berjewendiyên welatan e.

Eger ez bim ji bo mafên kulturî û çandî ewqas sal şer nakim, ji bo aştiya bi tirkan re ku hemû derew û xwe xapandine ewqas şehîd nadim, tenê ew hemû hêjayî wek destpêkê ne. Ji destpêkê bêhna serxwebûn û rizgarkirinê difûriya.

Bi gumana min eger Tirkiyê serûbinî hev nebe pirsa kurd çareser nabe. Ji xwînê ta bi xwînê, ji xwîna li ser pelikan ta bi xwîna li ser qahfikan.

26-07-2010